Ekzekutohet me 20 plumba ish-shefi i qarkullimit në Berat

Një biznesmen në qytetin e Beratit është vrarë mesnatën e së enjtes teksa po hipte në automjetin e tij në lagjen e njohur si ish-Kombinati. Viktima është identifikuar si Adriatik Mustafaraj i njohur në këtë qytet si biznesmen, por edhe si ish-punonjës policie deri në vitin 1997. Ngjarja ndodhi duke u gdhirë dita e premte, kur 52-vjeçari sapo kishte dalë nga një lokal aty pranë dhe ishte drejtuar për në automjetin e tij që ndodhej pranë një lavazhi. Në këtë moment ai është qëlluar nga dy persona të cilët i kishin zënë pritë pas lavazhit.

Menjëherë në vendin e ngjarjes shkuan drejtuesit e policisë lokale, të cilët pas veprimeve të para nisën hetimet për zbardhjen e motiveve dhe identifikimin e autorëve të dyshuar të krimit. Policia sekuestroi në vendin e ngjarjes mbi 20 gëzhoja të qitura nga një armë automajtike tip “Kallashnikov”, ndërsa autorët e dyshuar janë larguar nga qyteti.

Sipas burimeve të policisë lokale mësohet se 52-vjeçari prej vitesh jetonte mes Italisë dhe Shqipërisë. E shkuara e viktimës dhe veprimtara e dyshimtë e tij gjatë kohës që ka qëndruar në Itali sipas policisë mbetet një nga pistat më të forta të hetimit. Deri tani policia e Beratit ka shoqëruar disa persona, por ende nuk ka mundur të identifikojë autorët e krimit, të cilët dyshohet se janë më shumë se dy.